ಕಾಲುವೆಗೆ ಉರುಳಿಬಿದ್ದ ಟಾಟಾ ಇಂಡಿಕಾ…ನಾಲ್ವರು ಸಾವು…ಬದುಕುಳಿದ ಚಾಲಕ…

ಮಂಡ್ಯ,ಜು30,Tv10 ಕನ್ನಡ

ಚಾಲಕನ ನಿಯಂತ್ರಣ ತಪ್ಪಿದ ಟಾಟಾ ಇಂಡಿಕಾ ಕಾಲುವೆಗೆ ಬಿದ್ದ ಪರಿಣಾಮ ನಾಲ್ವರು ಸಾವನ್ನಪ್ಪಿದ ಘಟನೆ ಮಂಡ್ಯ ಜಿಲ್ಲೆ ಕಾಡುಕೊತ್ತನಹಳ್ಳಿ ಸಮೀಪ ನಡೆದಿದೆ. ನಿನ್ನೆ ರಾತ್ರಿ 8:30 ಗಂಟೆ ಸಮಯದಲ್ಲಿ ದುರ್ಘಟನೆ ನಡೆದಿದೆ. ಗಾಮನಹಳ್ಳಿ ಗ್ರಾಮದ ಬನ್ನೂರು ಮಂಡ್ಯ ರಸ್ತೆಯಿಂದ ಗ್ರಾಮದ ನಡುವೆ ಹಾದು ಹೋಗಿರುವ ದೊಡ್ಡ ಮಲಗೂಡು ರಸ್ತೆಯಲ್ಲಿ ಕಾಡುಕೊತ್ತನಹಳ್ಳಿಗೆ ತಿರುಗುವ ವಿಸಿ ನಾಲೆಯ ತಿರುವಿನಲ್ಲಿರುವ ಕಾಲುವೆಗೆ ಕಾರು ಉರುಳಿ ಬಿದ್ದಿದೆ. ಗಾಮನಹಳ್ಳಿ ಗ್ರಾಮದಿಂದ ಬನ್ನೂರು ತಾಲೂಕು ಗೊರವನಹಳ್ಳಿ ಗ್ರಾಮಕ್ಕೆ ಹೋಗುತ್ತಿದ್ದ ಟಾಟಾ ಇಂಡಿಕಾ ಕಾರು ನಿಯಂತ್ರಣ ತಪ್ಪಿ ಕಾಲುವೆಗೆ ಉರುಳಿದೆ. ಕಾರು ಚಾಲಕ ಮನೋಜ್ ತಕ್ಷಣ ಹೊರಗೆ ಹಾರಿದ ಪರಿಣಾಮ ಪಾರಾಗಿದ್ದಾನೆ. ಕಾರಿನಲ್ಲಿದ್ದ ಗಾಮನಹಳ್ಳಿ ವಾಸಿ ಮಹದೇವಮ್ಮ(60) ಗೊರವನಹಳ್ಳಿ ವಾಸಿಗಳಾದ ರೇಖಾ (40 ) ಮಮತಾ(45) ಹಾಗೂ ಸಂಜನಾ (19) ಮೃತಪಟ್ಟಿದ್ದಾರೆ.ಮೃತರು ಒಂದೇ ಕುಟುಂಬದವರು.
ಮೃತದೇಹಗಳನ್ನ ನೀರಿನಿಂದ ಮೇಲಕ್ಕೆ ಎತ್ತಿದ್ದು ಸ್ಥಳಕ್ಕೆ ಅರಕೆರೆ ಪೊಲೀಸರು ಆಗಮಿಸಿ ತನಿಖೆ ಕೈಗೊಂಡಿದ್ದಾರೆ. ಸ್ಥಳಕ್ಕೆ ಜಿಲ್ಲಾ ಪೊಲೀಸ್ ವರಿಷ್ಠಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ…